BADEDELWE ngebheyili ka-R20 000 umuntu ngamunye uNkk Tsakane Matlala nababili abeboshwe nabo ngecala lokuqasha indawo eseWaterkloof ebiza u-R95 000 ngenyanga okuthiwa basebenzise isivumelwano somgunyathi abathi isona esiqinisekisa ukuyiqasha kwabo.
UTsakane ungunkosikazi kasomabhizinisi obhadle esitokisini, uMnu Vusumuzi ‘Cat’ Matlala osahamba uxhaxha lwamacala athinta inkohlakalo, ukukhwabanisa nokuzama ukubulala.
UNkk Matlala ubeboshwe nababili okunguGiven Makofane noClaudette Masethe anabo emacaleni abhekene nomyeni wakhe abangaphandle nhebheyili kuwona.
Bebeboshwe ngoLwesibili. Kwenzeka lokhu nje umyeni wakhe uMnu Cat Matlala akakaze ayithole ibheyili njengoba selokhu ahlala esitokisini kanti kulindeleke ukuthi abuyele enkantolo ngenyanga ezayo njengoba esazoqhubeka nokufaka isicelo sebheyili.
Emacaleni okuzama ukubulala abhekene noMatlala, kuthiwa wazama ukubulala owayeyintombi yakhe uTebogo Thobejane ongusaziwayo nomlingisi nokuzama ukubulala usomatekisi ohlonishwayo uMnu Joe ‘Ferrari’ Sibanyoni. Kwawenkohlakalo kukhona nelethenda yamaphoyisa ka-R360 million eyanikwa inkampani yakhe iMedicare24.
tndlovu@ilanganews.co.za
