INTATHELI YELANGA
USEPHINDE adume ngakho uSiviwe “Chippa” Mpengesi ongumnikazi weChippa United, njengoba kuvela ukuthi usekhombe indlela uSinethemba Badela obecija le kilabhu.
Kuthiwa uMusa Nyatama olandwe ukuyoba ngumsizi kaBadela, nguyena ojimisa iChippa njengoba yenza amalungiselelo omdlalo weBetway Premiership neTS Galaxy okusasa ngoLwesibili eBuffalo City Stadium, e-East London ngo-19h30.
KUSUKA kwesobunxele nguSinesipho Mali, nguChippa Mpengesi noSinethemba Badela.
Ngokuthola kweLANGA, uBadela uthuthe yonke imigodla yakhe, waphuma waphela kule kilabhu.
Kubikwa ukuthi akaxoshelwanga imiphumela, kodwa kungenxa yokungashayisani noSinesipho Mali osanda kuqashwa njenge-sporting director kwiChippa.
UBadela ususwa kulesi sigqiki nje, ubesadlale imidlalo emibili nje kuphela. Kowokuqala ubumbabe neMamelodi Sundowns ngo-1-1, wehlulwa ngo-1-0 yiDurban City. Yomibili le midlalo bekungeyeligi.
