KUVELA izindaba ezishaqisayo nge-Athletics South Africa (ASA) njengoba kuthiwa kayisabhalisiwe ngaphansi kweCompanies and Intellectual Property Commission (CIPC). Kuthiwa isifana nento engekho ngemuva kokuba iCIPC isiyikhiphile ngaphansi kwayo.
I-ASA, okuyinhlangano ephethe ezokugijima eNingizimu Afrika, kuthiwa ikhishwe mhla ka-5 kuFebruary kulo nyaka kwiCIPC ngenxa yokungayilandeli imigomo kahulumeni. ILANGA linayo incwadi ephuma kwiCIPC eqinisekisayo ukuthi i-ASA isifana nento engekho.
Kuthiwa selokhu yakhishwa kwiCIPC, i-ASA kayikaze ithi vu ngalolu daba. Kuthiwa okwenza ukuba inkampani ikhishwe ngaphansi kweCIPC kokunye kusuke ingayilandelanga imigomo yomqoqintela (SARS) isikhathi eside.
Le nhlangano okuzokuthi ngoLwesithathu isingathe imidlalo ye-Athletics Grand Prix isifana nento engekho, okuyinto ethathwa ngokuba wubudedengu kabaphathi be-ASA eholwa nguJames Moloi.
Kwenzeka lokhu nje, kuzokuthi ngoMay le nhlangano ibe nokhetho lokuqoka abaholi abasha. Kuzokhumbuleka ukuthi ngesikhathi kungena uMoloi, ekhipha u-Aleck Skhosana ngo-2021, akubanga ngisho elilodwa ilungu eliphuma KwaZulu-Natal kule nhlangano.
