KULINDELEKE akhuze ibuya kwiMamelodi Sundowns uPercy Tau owayishiya kumasizini awu-9 adlule ethathwe iBrighton & Hove Albion edlala kwi-English Premier League (EPL) e-England.
Ukhuza ibuya nje, ugcine ukuba semabhukwini eThep Xahn Nam Dinh FC yaseVietnam. Leli nxele elineminyaka ewu-32 ubudala lifika nesipiliyoni esiningi kwiSundowns njengoba linqobe izicoco ezintathu zeCaf Champions League, nezimbili zeCaf Super Cup ne-Al Ahly yase-Egypt.
Umthombo okomkhulu leSundowns, eChloorkop, uthe uTau ufikile ngoLwesibili ejimini.
“UPercy uqale wajima yedwa amasonto amabili namuhla (ngoLwesibili) uqale ukujima neqembu lonke. Unobudlelwano obuhle nabaphathi beqembu. Wonke umuntu uyazi ukuthi wahamba eyenzeleni ikilabhu. Indaba yeminyaka kasiyinaki ngoba siyazi ukuthi uma engena enkundleni, uzogila izimanga,” kusho umthombo.
Eyokubuyela enkundleni idale isasasa ezinkundleni zokuxhumana ngesikhathi umqeqeshi weBafana Bafana uPitso “Jingles” Mosimane enameka umbhalo ekhasini likaTau ku-Instagram lapho kuvela lo mdlali ejima yedwa wathi, “The Return!!”.
Sekuke kwavela neyokuthi kunamakilabhu ase-Egypt amfunayo kodwa kubukeka ekhethe ukuzogugela ngakubo lo mdlali odabuka eMpumalanga.
UTau ufike isimo simapeketwane ekhempini njengoba iDowns idliwe emidlalweni emqoka. Iqale yakhishwa kwiChampions League obekulindeleke ukuba iyivikele kanti ngeSonto iphendulwe izingane ezincane idliwela ekhaya yi-USM Alger yase-Algeria ngo-3-1 kwiCaf Super Cup eLoftus Versfeld Stadium.
Lokhu kakwehlanga kahle kubalandeli bayo ababonakale bethuka umqeqeshi uMiguel Cardoso bethi makaqoqe amasaka akhe abuyele ePortugal. UTau ungumdlali wesibili ukushaya ibuya kwiDowns kule sizini njengoba ekuqaleni kwayo yamukele uCassius Mailula.
