USEXOLISILE kubalandeli bebhola likanobhutshuzwayo eNingizimu Afrika uSinesipho Mali owazwakala kwenye yama-video ethi abantu mabakhulume kodwa bona benza umsebenzi.
Le video eyavela ngemuva kokuqopheka komlando iBafana Bafana ishaya iSouth Korea idlulela esigabeni se-Last 32 koweFIFA World Cup yanenga abaningi abanye bamgxeka ngayo besho nokuthi bekungamele aphawule ngale ndlela.
UMali oyi-Performance Analyst yeBafana Bafana uphumele obala izolo ngoLwesine ohlelweni lwezemidlalo lweMetro FM olushayelwa u-Andile Ncube exolisa ngenkuluma yakhe.
Uthe uyazisola ngale nkulumo futhi uyavuma ukuthi kwakungamele aphawule ngendlela aphuwala ngayo.
Uthe nakuba ezisola ngokukhuluma ngale ndlela kodwa uyakugxeka ukuthi kube khona abamsabisa ngikumyisa kwagoqanyawo nalabo abaqoke ukuhlukumeza nokusabisa unina.
Uthe uyalibona iphutha lakhe futhi uyakuqonda ukuthi ibhola likanobhutshuzwayo linabalandeli abaningi futhi abanemibono ngalo.
Uyakwamukela ukuthi abantu baqhubeke babe nemibono njengoba kuyilungelo labo.
UMali uthe ngemuva kokuzinuka amakhwapha ube eseqoka ukushenxa esikhundleni sakhe sokusebenza neqembu lesizwe.
Uthe ukushenxa kwakhe kulesi sikhundla akusho ukuthi sekuphelile ngaye kwelikanobhusthuzwayo.
Uthe usazoqhubeka nokucathulisa ngolwazi nokufundisa kulo mdlalo njengoba ebenza phambilini.
