UZOKWANDULELWA ngemicimbi yekhethelo umcimbi waminyaka yonke Ugu Jazz Festival okulindeleke ukuthi uhehe izinkulungwane zabantu ogwini oluseningizimu neKwaZulu Natal ozoba ngomhla ka-27 kuJune nonyaka.
Lo mcimbi we-jazz ukhuze ibuya ngonyaka owedlule njengoba usuwenzeka ngaphansi kwedili lemicimbi eyenzeka ngaphansi kwe-Off Ramp Experience ezoqala kusukela ngomhla ka-25 kuya kumhla ka-27 kuJune kophezulu.
Lo mcimbi owethulwe ngokusemthethweni ngenyanga eyedlule ayaqhubeka amalungiselelo awo njengoba kulindeleke ukuthi wandulelwe ngemicimbi eyehlukene yekhethelo ngaphambi kowe-jazz okuzobe kuyiwona okubhekwe ukuthi udonse abantu abaqhamuka ezinkalweni ezahlukene nesifundazwe nakwezinye izindawo nangaphandle kwezwe.
Lo mcimbi we-jazz uzokwandulelwa ngowesidlo sakusihlwa obizwa nge-Offramp Experience Gala Dinner in Comedy ozoba ngomhla ka-25 kuJune.
Kulo mcimbi kuzobe kuboshelwe osomahlaya abahlukene okubalwa kubo uSimphiwe Shembe, Simunye Churchboy, Mondli Mzizi noNonto R nabaculi okuzobe kunandisa uMondli Ngcobo noZawadi Yamungu.
Kulabo abanothando lokuhambela lo mcimbi ozobe usoGu Sports And Leisure amathikithi ayatholakala eTicketpro, ePick n Pay, Spar naseBoxer ngo-R250 ajwayelekile noR600 wezicukuthwane.
Ngomhla ka-26 kuzobe kunowe-gospel okuzobe kuboshelwe kuwona uMpumi Mtsweni, Nontokozo Mkhize, Sgwili, Mthokozisi Nkosi, Nkanyiso, Shongwe and Khuphuka, Jumbo, Melusi Mbokazi nabanye ozobe uyimvuselelo ehambisana nabefundisi abehlukene.
Amathikithi wona abiza uR200 noR600 wezicukuthwane. Kowe-jazz ngomhla ka-27 kuzobe kuboshelwe uDon Laka, Siphokazi, Ernie Smith, Naledi Aphiwe, Mnqobi Yazo, Mawelele, Danya, Bongani Nkwanayana, Olefied Khetha, DJ 101, DJ Muntu Jikeleza, Fanie Dick, Tender Mavundla DJ Mshediz nabanye abaningi.
Umhleli walo mcimbi uSiya Msomi uthe inhloso enkulu wukubungaza amasiko nenjabulo kanjalo nokuqhakambisa ubuhle baseSouth Coast kanjalo nokufukula umnotho wakule ndawo egabe kakhulu ngezokuvakasha.
Uthe kuyamthokozisa ukubona isasasa elikhonjiswa ngamaciko nazo zonke izinhlaka ezibasekayo ngalo mcimbi.
Amathikithi omcimbi we-jazz nawo aseqalile ukutholakala ngo-R250 ajwayelekile kanti awezicukuthwane uR350 kanti awezitatanyiswa wona abiza R1000.
