KUNYAKAZE izinkundla zokuxhumana umculi kamaskandi uKhuzani “INdlamlenze” Mpungose eveza imoto yakhe entsha ceke ebiza imali eshiswe.
Uthenge iLand Rover Defender ebiza u-R2.6 Million kheshi. UKhuzani uthe lokhu ukwenziswe ngukuthi abalandeli bakhe bameseke kakhulu emculweni njengoba ebeklonyeliswa ezinsukwini ezedlule inkampani yomculo i-Universal ngezindondo zamaPlatinum namagolide okudayisa kahle komculo wakhe.
Uthi ukuklonyeliswa kwakhe, kube yizinkomba zokuthi ukuculela kwakhe abantu, kwenza umehluko kwabanye abantu.
“Uthando engilukhonjiswe ngabantu emculweni wami bengeseka, ngibone ukuba ngibabonise ngokwenza into enhle nabo abazoziqhenya ngayo njengomculi abamulandelayo, ” Kusho uKhuzani.
Uthe lokhu kuyingxenye yokugubha izindondo ahlonyuliswe ngazo.
“Izinkampani zomculo eziningi ziyesaba ukuklomelisa amaciko, kodwa i-Universal yenze okuhle, ” esho.
Lo mculi uthole lezi zindondo emuva kokuba abakwaRisa begunyaze ukukhishwa izitifiketi eziqinisekisa ukwenza kahle kwezinye zezingoma zakhe ezingaphezulu kwezinhlanu.
