SEKUZOKUBA yicala kubashayeli bezimoto baKwaZulu-Natal, ukushayela nge-number plate endala ngemuva ngomhla ka-30 kuLwezi (November) walo nyaka.
Abashayeli bezimoto banxuswa ukuvakashela ezikhungweni zezokushayela (licensing offices) ukuze kushintshwe izinombolo zabo ezindala. Nokho kulabo abazovuselela amalayisense ezimoto ngaphambi kosuku lomnqamulajuqu (30 kuLwezi), kubona izoziguqukela inombolo. Kuzokhumbuleka ukuthi lezi zinombolo ezintsha, zethulwa ngenxa yokuthi bese zishoda ezintsha ohlelweni oludala.
“Ukwehluleka ukushintsha i-number plate kusenesikhathi, kuzoholela ekutheni uhlawule ngoba lokho kuyobe kuwukwephula umthetho weNational Road Traffic Act,” kusho umnyango wezokuthutha.
Abashayeli bezimoto banxuswa ukwazisa imishwalense abakuyona ngoguquko lwe-number plate, okuzosiza lapho befaka isicelo sesinxephezelo (claim). Kufanele bazise nebhange uma imoto ingakaqedwa ukukhokhelwa noma uma besebenzisa ikhadi lika-petrol kanjalo nesiqomphamkhondo (tracker).
