ASHAQWE esemsebenzini amaphoyisa amabili esiteshini sase-Vryheid, asolwa ngecala lokwebiwa kwemfuyo, okuyinto edla lubi kuleya ndawo.Kubikwa ukuthi la maphoyisa, ashaqwe engazelele, esemsebenzini ngoLwesine ekuseni.
Kuthiwa asolwa ngokubhala izimbuzi ezazebiwe emabhukwini asemaphoyiseni.
Kuthiwa abe esehlela ukuba umuntu othile aqambe amanga, athi ngezakhe izimbuzi ezebiwe ukuze ezofika azilande emaphoyiseni.
Kuthiwa akwenza lokho, zadedelwa izimbuzi okungacaci ukuthi zazingaki.
Kuhambe isikhathi wafika umnikazi wezimbuzi wangempela esiteshini ethi uzozilanda, wafika sezinikwe omunye umuntu.
Kunezinsolo zokuthi akwenza lokhu ngenhloso yokuthi ayozidayisa.
Kuthe ngoLwesine ekuseni engazelele lutho la maphoyisa athintekayo, ashaqwa esemsebenzini.
“Kuthiwa kunesigameko lapho abhalisa khona izimbuzi ezebiwe ndawana thile. Kusolwa ukuthi abe esehlela umuntu owazenza umnikazi wazo ukuthi ayozilanda esiteshini. Abe esezidedelela kuyena, okuthe sekufika umnikazi wazo wangempela, wathola zingasabonwa izimbuzi. Kuyasolakala ukuthi yinto abebevame ukuyena lena.” kusho umthombo.
Ilungu lomphakathi elikhale ngezinga eliphezulu lokwebiwa kwezimbuzi, lithe le nkinga iyakhathaza uma sekuzothinteka namaphoyisa kuyona.
“Siyasola ukuthi kabaqali ukuyenza le nto ngoba sekukaningi abantu belahlekelwa yimfuyo yabo. Uma sekuboshwa amaphoyisa asolwa ngalokhu, kuyacaca ukuthi le nkinga yamasela emfuyo isekude ukuxazululeka. Uma amaphoyisa nawo esezosebenza nezigebengu, kuyacaca ukuthi kusekude phambili,” kusho umthombo. Iphoyisa elingagunyaziwe ukuphawula kwabezindaba, likuqinisekisile ukuboshwa kwala maphoyisa esemsebenzisi
ngezinsolo zokweba imfuyo.
Imizamo yokuthola ukuphawula kwe-Independent Police Investigative Directorate (IPID), kayiphumelelanga njengoba sishicilelele imibuzo ebithunyelwe ngokuboshwa kwala maphoyisa, ingaphendulwanga.
