UPHIKO lwezokuShushisa koMphakathi selukhiphe isinqumo sokuthi ahoxiswe wonke amacala abhekene noKhomishana wamaPhoyisa kuZwelonke, uGeneral Fannie Masemola. UMasemola ubemisiwe emsebenzini njengoba ehamba lawa macala aboshelwa wona, waphuma ngebheyili.
Umqondisi ophikweni lokuShushiswa koMphakathi, u-Adv Andy Mothibi ukhiphe umyalelo wokuba kuhoxiswe amacala abebhekene noMasemola emuva kokubuka icala ebelilethwe yi-Independent Directorate Against Corruption (Idac), okuwuphiko olungaphansi kweNational Prosecuting Authority (NPA). Uthe abukho ubufakazi obuqinile ukuthi uMasemola angashushiswa ngawo.
Ubebhekene namacala athinta okukhishwa kwethenda ka-R228 million neka-R360 million eyanikwa iMedicare24 okuthiwa ayihanjiswanga kahle. IMedicare24 iphethwe usomabhizinisi, uMnu Vusumuzi ‘Cat’ Matlala.
UMasemola ubethweswe amacala okuphula isigatshana somthetho uSection 38, wePublic Finance Management. Umthetho awusebenzisile u-Adv Mothibi uphoqa ukuthi angenelele futhi anikwe izizathu ezinqala zokuthi osolwayo kumele ashushiswe.
Ngokophenyo lwakhe kuvele ukuthi uphiko lokuphenywa komphakathi lwehlulekile ukuhambisana nomthetho olawula ukushushiswa kwabantu nokuletha izizathu eziqinile zokuthi kumele ashushiwe uMasemola. Uthe ukuqhubeka nokushushisa umuntu zingekho izizathu eziqinile, akuwusizi ngalutho umphakathi.
