AMATHE abuyele kwasifuba kuNdlunkulu wesithathu weSilo samaZulu, uMisuzulu kaZwelithini, ngemuva kokwethulwa kwentokazi yasebukhosini baseMpumalanga nengase ithathe isikhala sakhe sokuba nguNdlunkulu wesithathu njengoba umshado wabo usuhlehle kaningi.
Imithombo yaleli phephandaba iveza ukuthi emcimbini obusesigodlweni saseMashobeni ngoLwesithathu, le ntokazi beyikhona, isina nezinye ebezisesibayeni. Kuthiwa isinesikhashana ifikile eNdlunkulu ngemuva kokumiswa kweduku iqoma iSilo ngokusemthethweni.
Le ntokazi kuthiwa maningi amathuba okuthi ibe nguNdlunkulu wesithathu njengoba kunamahebezi athi kukhulu ukungazwani okukhona phakathi kweSilo nalowo okulindeleke ukuba abe nguNdlunkulu wesithathu uNkz Nomzamo “Masesi” Myeni, waseMakhonyeni, eJozini, okumanje uhlala esigodlweni saseMachobeni, eNgwavuma.
Imithombo ithi njengoba uMaMyeni neNgonyama bengashadanga ekupheleni kukaMasingana (January), kakukhona nje ukuthi bekunosiko obekumele lwenziwe kuqala, kepha yingoba vele sengathi kayisahoshelani kahle phakathi khwakhe neSilo, sesisha amashushu ngentombi yaso entsha. Ngakulonye uhlangothi abakwMyeni bayafunga bayagomela ukuthi kumnyana kubomvu umshado uzobakhona ngoba bona bathenjiswa kanjalo futhi kabakaze babikelwe ukuthi kunezinkinga ezikhona phakathi kwalaba bobabili.
Kunephephandaba lesiNgisi eliveze ukuthi ngelanga intokazi yaseMpumalanga eyayizokwethulwa ngalo, khona owahlebela uNdlunkulu uMaMyeni ukuthi sekunomnakwabo omusha nokuthiwa wathukuthela wathelwa ngamanzi, waqonda ngqo lapho kwakwethulwa khona intombi yeSilo. Kuthiwa ingxabano yabo yaba yimbi kodwa futhi yaphinde yaqinisekisa ukuthi lukhona uqhekeko olukhona phakathi kwabo.
Leli phephandaba lize liveze ukuthi njengoba iSilo besekwaziwa nje ukuthi uma sinohambo, sihamba noMaMyeni, itshe ligaya ngomunye umhlathi manje njengoba sesiye amahlandla amaningana koninalume eSwatini, sihamba nesinqandamathe saso esha. Yize noma ingeminingi imininingwane ngale ntokazi kodwa kuthiwa ilinganiselwa eminyakeni engaphezuku kancane kuka-20.
ILANGA likhulume nesihlobo sakwaMyeni esithe siyayeshwama le mibiko ikakhulukazi eyokungaboni ngaso linye phakathi kweSilo nendodakazi yakhona.
“Thina sisamile ekutheni abaseNdlunkulu bafike balobola lapha kwaMyeni ngoba bebone imbali futhi abathembise ukuthi bazoyishada. Thina silinde kubuye abaseNdlunkulu bazositshela ukuthi usuku olusha lomshado lunini ngoba kwakufanele kudlule lo msebenzi obewenziwa ngesonto eledlule,” kusho yena.
Kuvela lezi zindaba njena, bekukuningi ukuqagela ngobudlelwano baMaMyeni neSilo, njengoba kuke kwavela nokuthi sike samxosha nasesigodlweni saseMachobeni. Nakhona lapho kuthiwa sathi siseSwazini sihambe nesinqandamathe saso esisha, sashayela abathile ucingo sathi mabaxoshe uMaMyeni, okuthiwa ubuye ngenkani ngemuva kokuxoshwa. Nasemcimbini wokugcina ababonakale kuwona sengathi bazwene kuthiwa kwase kwenzelwa amehlo abantu njengoba kwase kunokuqagela okuningi ngobudlelwano babo.
Iso leSilo, uMntwana uNathi waKwaMadlakazi uqinisekisile kuleli phephandaba ukuthi ikhona intokazi esanda kuzoqoma iSilo okungeyaseMpumalanga.
“Kuliqiniso ukuthi kunentokazi ebeyivunule ngokwaseMpumalanga ebeyingxenye yezintokazi ebezisina esibayeni ngoLwesithathu nesanda kuqoma iSilo,” kusho yena. Akakwazanga ukusho amagama abo nobukhosi ezalwa kubo.
