INKAKHA yomdlali wakuleli owazakhele udumo egijima kwi-Orlando Pirates nakwiBafana Bafana uSiyabonga “Nsimbi” Sangweni akawuvali umlomo ngethalente elikhonjiswe yintsha yaseJozini kwiMayoral Cup yalo masipala ebisezinkundleni zemidlalo, eNdumo.
Kulo mqhudelwano bekuqhudelwano ngebhola lezinyawo, ukugijima, iVolleyball, iNetball neminye imidlalo eyahlukene kanti iMeya yaseJozini uScelo Myeni ithi inhloso yayo bekuwukuvundulula ithalente. Le midlalo iqale kudlala ama-wadi kaMasipala waseJozini awu-23, kwathi ngempelasonto kwadlalwa eyamanqamu kanti bekumenywe izinkakha ukuzobheka ithalente.
Phakathi kwabadlali abebemenyiwe bekuwuNsimbi, uSiyabonga Ngcobo noPhakamani Nxumalo weMidlands Wanderers edlala kuMotsepe Foundation Championship (MFC).
UNxumalo uthe uthole abadlali abathathu kulo mqhudelwano azobathatha ayobafaka kwiMidlands Academy, okuyisikhungo esibakhiqizela iMidlands abadlali. UNxumalo uthe ithalente likhulu kakhulu ezindaweni zasemakhaya.
UNsimbi uthe: “Le midlalo iyabasiza kakhulu abadlali ukuba baveze ithalente labo. Abanye abafundi abaphiwanga esikoleni, ngakho-ke kuyasiza ukuba baveze ithalente labo.”
IMeya uMyeni ithe le midlalo ike yaphazamiseka phambilini ngenxa yezinkinga ababe nazo.
“Siyabakhuthaza abadlali ukuba bazimisele ngoba ngeke siphile ngemfundo sonke. Sinadlali abaningi abenza kahle lapha kukhona uSiyabonga Mpotshane owayedlala kwi-Orlando Pirates, owavela kule midlalo. Intsha mayizimisele ngoba ikusasa layo kalilazi. Miningi eminye imidlalo esinayo eqhubekayo lapha eJozini masonto onke,” kusho iMeya.
Abanqobe ibhola lezinyawo kube wu-wadi 18, u-wadi wanqoba iNetball, iBoxing yahamba noMasiyane, kwathi u-wadi 5 wadla ubhedu kwiVolleyball, kanti u-wadi 5 uphinde wanqoba kuma-IGs.
U-Amahle Dlamini udle umhlanganiso kwi-5km ku-Under 15 kwabesifazane, kwabesilisa ingqwele kwaba nguMfanafuthi Ndabandaba. Ingqwele ye-10km kwabesilisa kube nguThembinkosi Myeni, u-Andiswa Shongwe wanqoba kwabesifazane.
