USONGELA iKaizer Chiefs umqeqeshi weZESCO United yaseZambia uMathews Ndhlovu njengoba ethi kukhona okusina kuyijeqeza.
IZESCO izobhekana neChiefs emlenzeni wesibili ka-group D weCaf Confederation Cup kusasa ngeSonto ngo-15h00 eMoses Mabhida Stadium, eThekwini.
Emlenzeni wokuqala obungeledlule eZambia iChiefs inqobe ngo-1-0 wegoli likaPule Mmodi.
IZESCO idinga iwini kumnyama kubomvu ngoba uma ike yahlulwa kuyobe sekuphelile ngayo kulo mqhudelwano.
UNdhlovu uthi kukhona okusina kuyijeqeza iChiefs.
“Into esibulele emdlalweni odlule ukuthi sisuke sabahlonipha, sabayeka bazicanasela. Size saphaphama ngesiwombe sesibili, sazama ukubavula kwasho kona ukuthi isikhathi kasisekho.Kulokhu ngeke sibanike inhlonipho, sizolwa nabo umdlalo uqala kuze kube uyophela.Okuhle wukuthi sesiyabazi, sibabonile lapho bebuthaka khona. Sesiwazi kahle amaphutha abo noma kanjani sizosebenza ngawo,” kusho uMathews.
ULindo Mkhonta ukaputeni weZESCO uthi akafuni ukwanda ngengevu bazozikhulumela ensimini.
