UMENGAMELI weConfederation of African Athletics (CAA) uMaloum Kalkaba, okuyinhlangano engamele ezokugijima e-Afrika, useshayele ihlombe abasubathi base-Afrika abebeyibambe emlanzeni wesithathu weDiamond League ngeSonto eRabat, eMorocco.
IDiamond League inemilenze ewu-15 kanti uwodwa vo ogijinywa ezwenikazi i-Afrika. Abasubathi base-Afrika bakukhombisile ukuthi inkunzi kayikhishwa esibayeni sayo njengoba imijaho eminingi inqotshwe ngabalapha kuleli zwekazi.
U-Akani Simbine uqhubekile nokukhonya kwi-100m njengoba edle umhlanganiso ngesikhathi esiwu-9.95, emiswe kabi nguFerdinand Omanyala waseKenya ophethe irekhodi lase-Afrika kuleli banga.
Kwi-800m, uPrudence Sekgodiso ungene isibili kwi-800m eqopha isikhathi esiwu-1:57:52 elandela uTsige Duguma wase-Ethiopia onqobe ngesikhathi esiwu-1:57:42.
UWayde van Niekerk ungene endaweni yesihlanu kwi-200m ngesikhathi esiwu-20.26 kwathi uBenjamin Richardson wangena unombolo 7. UZakithi Nene waKwaZulu-Natal ungene isibili kwi-400m ebeka u-44:46, lapho kunqobe khona uJacory Patterson wase-USA owenze u-44:37.
UZakithi ulokhu eqhubeke njalo nokwenza ngcono isikhathi sakhe se-400m njengoba esuka ku-43:64.
UKalkaba uthe: “Ngijabule kakhulu ngendlela abasubathi base-Afrika abagijime ngayo kulo mqhudelwano. Uma ubheka wonke umqhudelwano, bekunqoba umsubathi wase-Afrika, okuyinto enhle. Ngisakhala namanje ngokuba nomlenze owodwa weDiamond League e-Afrika.
“Kufanele ngabe sinawo omunye obanjelwa eNigeria noma eSouth Afrika. Ngendlela i-Afrika eyenza ngayo, nginethemba lokuthi abadidiyeli balo mqhudelwano bazosibona isidingo sokuwandisa e-Afrika.”
Kusenjalo, uBayana Walaza uqhubekile nokwenza amarekhodi kuleli ebeka u-9.94 kwi-100m esigabeni samajuniya, ephula irekhodi lakhe u-9.99, egijima kwiBoris Hankezovic Memorial Race eZagreb, eCroatia.
