UKHATHAZWA wukungenelwa ngamagoli aqhamuka emabholeni agotshiwe – abahlulwa wukuwamaka – umqeqeshi weMamelodi Sundowns, uMiguel Cardoso. IDowns idlulele kuma-semi final eMTN8 yehlula ngo-3-2 esikhathini esengeziwe iPolokwane City ngoMgqibelo ebusuku eLucas Moripe Stadium, e-Atteridgeville.
Amagoli eDowns ashaywe nguTebogo Mokoena, u-Antonio van Wyk noCassius Mailula. AwePolokwane ashaywe nguBonginkosi Dlamini noTidimalo Molokwane. UCardoso uthi le nkinga yokwehluleka ukumaka amabhola agotshiwe kufanele bayilungise ngokushesha ngoba beyibahlupha nangesizini edlule.
“Umdlalo wethu nePolokwane ubunzima, besingafuni ukuthi uye esikhathini esengeziwe ngenxa yezimo esibhekana nazo.
Abadlali bami abakabi fithi kahle ngenxa yokuthi amalungiselelo ethu okuqala kwesizini kawazange ahambe ngendlela ebesifisa ngayo.
“Abadlali bami bakhathele ngenxa yokuthi abanye babo basijoyine sekuhambe isikhathi ngenxa yokuthi bekufanele sibaphumuze njengoba bebedlala emqhudelwaneni weNdebe yoMhlaba kanti abanye basalimele.
“Kodwa-ke inkinga esinayo siyahluleka wukumaka amabhola agotshelwa ebhokisini lethu. Uma ubuka womabili amagoli abawashayile bekungamabhola agotshiwe, esihluleke wukuwamaka. Nangesizini edlule besinenkinga efanayo okuchaza kona ukuthi kuzofanele siyisukumele ngokushesha le nto,” kusho uCardoso.
