UMHOLI we-Action SA, KwaZulu-Natal, uMnu Zwakele Mncwango, uthi ziyamkhathaza izigameko zakamuva zokungabekezelelani ngokwepolitiki esifundazweni.
Ukusho lokhu ngemuva kokuvela eNkantolo eNkulu yaseThekwini kukaMnu Xolani Hadebe, oqhumise isibhamu ngesikhathi kunombuthano wokuvulwa kweziko le-Action SA eSydenham, eThekwini, ngeSonto. UHabede uvele enkantolo ngoLwesibili lapho ebhekene necala lokuqhumisa isibhamu ebhilidini elinomphakathi nelokudala uthuthuva.
Lo mhlangano wokugcoba iziko le-Action SA, ugcine ungaqhubekanga ngoba abantu ababewethamele, baziwa bengaphephile.
“Asinandaba ukuthi umuntu owenza le nto ngowaliphi iqembu, noma inhlangano. Siyawanxusa amaqembu ukuthi afundise abalandeli bawo ngokubaluleka kokubekezelelana ngokwepolitiki. I-Action SA ikhona, ngeke ishatshalaliswe wukwesatshiswa.
“Sifuna amaphoyisa asibuzele lo muntu (uHadebe), ukuthi uze aqhumise isibhamu nje, kugcwele abalandeli bethu ehholo, wayehloseni futhi ethunywe ngubani,” kusho uMncwango.
Abazibonela bathi kufike imoto yohlobo lweToyota Quantam, kwehla abantu kuyo, baqonda ehholo okwakuhlangenwe kulo, umhlangano ungakaqali. Kuthiwa yilapho-ke umsolwa, uHadebe, aqhumisa khona isibhamu.
Ababekhona ehholo bamubamba, bamephuca isibhamu umsolwa, bamusa ekamu lamaphoyisa. Uzovela futhi enkantolo ngomhla ka-24 kuyona le nyanga.
menzi.jele@ilanganews.co.za
