AMAPHOYISA adubule abulala abasolwa abathathu abadubulane namaphoyisa eBhambayi eNanda ngoMgqibelo ntambama.
Kubikwa ukuthi amaphoyisa alunywe indlebe ngokuthi bakuphi laba basolwa abebefunelwa uxhaxha lwamacala aseNanda naseMlazi.
Okhulumela amaphoyisa aKwaZulu Natal uColonel Robert Netshiunda uthe amaphoyisa athole laba basolwa abahlanu bengaphakathi endlini.
“Ngesikhathi abasolwa bebona amaphoyisa asengaphandle kwalo muzi babe sebevulela ngenhlamvu bebhekise emaphoyiseni. Kwabe sekuqala ukudubulana phakathi kwabasolwa namaphoyisa,” kucha uNetshiunda.
Uqhube ngokuthi ngesikhathi kudutshulwana kube sekudubuleka abasolwa abathathu bashonela khona endaweni yesigameko. “Kutholakale izibhamu ezintathu,” echaza.
Uthe abasolwa ababili bacele empunzini kanti amaphoyisa asabathungatha.
Uveze ukuthi phakathi kwamacala laba basolwa abebefunelwa wona kubalwa elokubulawa kwabantu abane okuhlanganisa ephoyisa elabe lingekho emsebenzini ethaveni yaseSundumbili.
