UFUNGA uyagomela ukugila iMamelodi Sundowns abakwenze kwiKaizer Chiefs uKhulekani Shezi ongumdlali weLamontville Golden Arrows, oqhamuke negoli elikhiphe Abafana basePhefeni kwiQuarter final yeMTN8.
I-Arrows – okuyiyona kuphela ikilabhu esimele iKwaZulu-Natal kwiMTN8 – izobhekana neSundowns emlenzeni wokuqala we- semi final yalo mqhudelwano namuhla ngeSonto ngo-15h00 eLucas Moripe Stadium, e-Atteridgeville. I-Arrows ifinyelele kulesi sigaba emuva kokuwashisa ijezi iChiefs ngo-1-0 kwi-quarter final emasontweni amathathu adlule eFNB Stadium, eSoweto.
Kuzokhumbuleka ukuthi igoli okunqobe ngalo i-Arrows lisuse ukukhuluma njengoba uShezi – odlala ophondweni lwesokudla emuva kuBafana Bes’thende – ebonakale sengathi uyaligoba ibhola, kanti unozinti weChiefs, uBrandon Petersen akekho emapalini, uShezi walibhekisa epalini, uPetersen wathi uzama ukulivimba, walifaka enethini.
UShezi ekhuluma naleli phephandaba, uthe basengakuphinda abakwenze kwiChiefs nakuyona iSundowns.
“Into engingayisho wukuthi ingcindezi kayikho kithina, ikwiSundowns. Thina okwethu wukudlala nje, sizibheke thina, silwele ukunqoba ngoba nathi sifuna ukufinyelela kowamanqamu. Okuhle wukuthi nasejimini uyabona ukuthi abadlali bakhuthazekile, sonke siwulangazelele lo mdlalo.
“Abantu bangakhohlwa ukuthi ngesikhathi siya emdlalweni weChiefs besinganikwa lutho, bazitshele ukuthi sekuphelile ngathi, kodwa sayimangalisa (iChiefs). Nakulokhu sizophinda okufanayo, abantu ngeke bakholwe. Umehluko lapha wukuthi kusewumlenze wokuqala, okusho ukuthi kufanele siqinisekise ukuthi kasehlulwa, ukuze sifike ekhaya sesiyoqedela umsebenzi. Engifuna ukukubeka kucace wukuthi uma iSundowns izokuza ngokuthi izozidlulela kithina, kukhona okuzoyethusa,” kusho uShezi.
Ube esenza isicelo kubantu baKwaZulu-Natal nakubalandeli bayo i-Arrows.
“Isicelo sethu wukuthi njengoba kuyithina esesimele iKwaZulu-Natal kulo mqhudelwano, baseseke. Siyathembisa ukuthi sizolwa ngoba sifuna ukuletha injabulo esifundazweni,” kusho uShezi.
Umlenze wesibili wala makilabhu uzokuba ngeSonto elizayo lomhla ka-30 kwephezulu ngo-15h00 eKing Zwelithini Stadium, eMlazi.
