Kuzohlonishwa amasosha akuleli awu-13 abulawe eDemocratic Republic of Congo, kuyona yonke imidlalo engaphansi kwePremier Soccer League (PSL) kule mpelasonto.
Umbutho wezokuvikela iSouth African National Defence Force (SANDF) ukuleliya lizwe emizamweni yokudala uxolo njengoba uhulumeni wakhona ubhekene ngeziqu zamehlo neqembu lamavukelambuso, iM23.
Esitatimendeni esikhiphe namuhla ngoMgqibelo, iPSL idlulise amazwi enduduzo emindenini yamasosha ashonile.
“Kuzokuba nomzuzu wokuthula ngaphambi kokuqala kwayo yonke imidlalo yeBetway Premiership, eyeMotsepe Foundation Championship neyeDStv Diski Challenge kule mpelasonto.
“I-PSL ithi dudu emindenini elahlekelwe kulesi sikhathi esinzima kangaka. Sengathi imiphefumulo yabashonile ingaphumula ngokuthula,” kusho isitatimende.
