USONGELA iBafana Bafana umdlali we-Egypt okhombisa ukuba sefomini kwi-Afcon eqale ngeSonto eMorocco.
I-Egypt izobhekana neBafana koka-group B ngoLwesihlanu ngo-17h00.
I-Egypt ihlule iZimbabwe ngo-2-1 kowokuvula ngoMsombuluko.
Isinde kukubi njengoba itakulwe nguMohamed Salah oshaye igoli lokuwina umdlalo usuyophela.
IZimbabwe ikore kuqala.
U-Omar Marmoush odlala kwi-Egypt nakwiManchester City yase-England – oqokwe njengomdlali ovelele kulo mdlalo weZimbabwe – usongela iBafana.
“Imiqondo yethu isibheke ngqo kulo mdlalo weNingizimu Afrika.
IZimbabwe isethusile, yenze sawubuka ngenye indlela lo mqhudelwano.
Lo mdlalo weNingizimu Afrika sifuna ukuqeda ngawo ngesiwombe sokuqala.
Sihlulwe yinqwaba yamathuba kwiZimbabwe kodwa lokho sizokulungisa ngalo mdlalo.
Sifuna ukuhlohla inqwaba yamagoli.
Asikhohliwe ngabakwenze kithina besikhipha kulo mqhudelwano ngo-2019 besihlula ngo-1-0 usingethwe yithina.
Basizwise ubuhlungu phambi kwabalandeli bethu ngakho-ke sifuna ukuziphindiselela,” esho.
