UMENGAMELI weRoyal AM uShauwn Mkhize uthi nakuba le kilabhu ibhekene nezinkinga, kodwa benza konke okusemandleni ukulungisa inkinga yokungaholelwa kwezisebenzi imiholo kaDisemba.
“Siyabuqonda ubunzima izisebenzi zethu ezibhekene nabo futhi sidlulisa ukuxolisa okukhulu kuzona nasemindenini yazo,” kusho uMaMkhize esitatimendeni asikhiphe namuhla ngoLwesithathu.
Uthe ikilabhu isebenzisana eduze nomlawuli ukuthola imvume yokudedela imali yemiholo yezisebenzi ezingaholile okubalwa kuzona nabadlali nethimba labaqeqeshi.
Le kilabhu ingaphansi kweso lomlawuli, uMnu JacoVenter, ngokomyalelo weSars, njengoba umnikazi wayo esolwa ngokukweleta umqoqintela imali elinganiselwa ku-R40 million.
Nangaphezulu kwalokho le kilabhu yagwetshwa yiFifa ukungasayini abadlali abasha njengoba ikweleta umgadli waseSerbia uSamir Nurkovic u-R15 million.
Ekuqaleni kwaleli sonto kuvele ukuthi abadlali badube ukuza ejimini yekilabhu, bekhala ngokungaholi, okuholele ekutheni kuhlehliswe umdlalo weThwihli Thwahla neChippa United obekumele ugijinywe ngoMgqibelo eNelson Mandela Bay Stadium.
