IQEMBU elikhulu lezepolitiki KwaZulu Natal Umkhonto weSizwe Party limise amalungu alo amathathu ngezinsolo zokungaziphathi kahle nokwephula imigomo yaleli qembu.
Ngokwesitatimende esikhishwe yileli qembu siveze ukuthi uMengameli waleli qembu uMnu Jacob Zuma nesigungu esiphezulu saleli qembu bathathe isinqumo sokumisa ngokushesha uDkt Kwazi Mbanjwa, uMnu Thobani Zuma noMnu Sifiso Zuma ngokungahambisani nomthethosisekelo weMK Party.
Siqhuba ngokuthi udaba oluthinta laba baholi selidluliselwe kumshushisi nokuyilapho kumele benze izethulo zabo kuyena.
Leli qembu liphinde lathatha isinqumo sokuhoxisa nokumisa uDkt Mbanjwa ekubeni nguSotswebhu waleli qembu nokuba yilungu leSishayamthetho kanjalo noMnu Thobani Zuma ekubeni yilungu lesiShayamthetho kuze kube udaba lwabo lufinyelela esixazululweni.
UMnu Sifiso yena umiswe esikhundleni sakhe sokuba imanenja yekhokhasi njengoba naye ebhekene nokuqondiswa izigwegwe.
IMK Party iveze ukuthi ngeke ikubekezelele ukuba namalungu angaziphethe kahle.
Libe selinxusa la malungu ukuba alandele imigudu efanele ukwenza izethulo zabo uma sekuqale uhlelo lokuqondiswa kwawo izigwegwe.
