BAZOPHEKWA ngemibuzo ePhalamende abeNational Energy Regulator of South Africa (Nersa), abasolwa ngokucindezela umphakathi ngentengo kagesi. Izikhulu zeNersa zibizelwe ePhalamende ngomhla ka-10 kule nyanga, lapho zizovela khona phambi kwekomidi eliqondene nogesi nezamandla (Portfolio Committee on Electricity and Energy).
UMnu Arico Kotze ongunobhala waleli komidi, ukuqinisekisile kwiLANGA ngoLwesithathu ukuthi iNersa izovela ngesonto elizayo ngoLwesithathu. Ukubizwa kweNersa kulandela ukuba iphinde yacasula umphakathi ngephutha eyalenza ngesikhathi ithatha isinqumo mayelana nesicelo sakwa-Eskom, sokwenyusa intengo kagesi.
Lelo phutha lizolungiswa ngokuthi kwengezwe enye imali kule iNersa eyayigunyaze ukuba i-Eskom yenyuse ngayo intengo. Lokhu kusho ukuqonga kwenkinga ngentengo kagesi emba eqolo eNingizimu Afrika, ekhalisa abantu abaningi.
Ngonyaka ozayo intengo kagesi isizokwenyuka nga-phezu kwalokho iNersa eyayikumemezele ngoMasingana (January), ngesikhathi ithatha isinqumo ngesicelo se-Eskom sokwenyuswa kwentengo kagesi. NgoMasingana (January) walo nyaka iNersa yagunyaza ukuba i-Eskom yenyuse intengo kagesi ngo-12,74% kulo nyaka; kuthi ngonyaka ozayo yenyuse ngo-5,36%; bese kuthi ngonyaka olandelayo
yenyuse ngo-6,19%.
Kodwa kuthe sekubonakele ukuthi yenza iphutha ngesibalo semali engenayo kwa-Eskom, okuyindlela esetshenziswayo uma kuthathwa isinqumo sokwenyuswa kwentengo, kwase kudingeka ukuba kulungiswe lelo phutha.
I-Nersa ithi kulo nyaka akuzokwenzeka shintsho, kodwa ngonyaka ozayo kuzokwengezwa u-3,4% ku-5.36% okwakugunyazwe ukuthi kwenyuswe ngawo intengo kagesi, lokhu okusho ukuthi isizokwenyuka ngo-8,76%. Onyakeni olandelayo kuzokwengezwa u-2,64% kulokho okwakuphasiswe yi-Eskom, okuwu-6,19%, osekuzoyenza yenyuke ngo-8,83%.
UNkk Busisiwe Mavuso, oyisikhulu esiphezulu seBusiness Leadership South Africa, uthi into engaba yisisombululo enkingeni yokwenyuka ngamandla kwentengo kagesi wukuba kuqiniswe ukuncintisana embonini kagesi – kwande izinkampani ezizimele, eziwuphehlayo ugesi.
Ugxeka indlela okunqunywa ngayo intengo kagesi njwngoba ekholwa wukuthi isiphelelwe yisikhathi.
