SELIQALILE ukucaba indlela ebheke okhethweni lohulumeni basekhaya iqembu lezepolitiki iNational Freedom Party kulandela umhlangano wesigungu esiphezulu sesifundazwe obubanjelwe eCoastlands eMhlanga ngoMgqibelo.
Leli qembu uNkz Mbali Shinga njengosihlalo weKwaZulu Natal libambe lo mhlangano nabobonke abajutshwe ezikhundleni zokuphatha kuhulumeni ookuhlanganisa amakhansela nezimeya zabo kulesi sifundazwe.
UNkz Shinga uthe lo mhlangano ube yimpumelelo ngoba bakwazile ukuqala ukucaba indlela ebheke okhethweni lwangonyaka ozayo lohulumeni basekhaya.
Uthe phakathi kwezinqumo abaphume nazo kube wukuqinisa ukusebenzela umphakathi kubona bonke abajutshiwe ikakhulukazi kulabo masipala abangenzanga kahle nalabo bephethe khona ngokubambisana namanye amaqembu.
“Siphume nokuthi kulabo esiphethe ngokubambisana namanye amaqembu sisebenze ngokuphindiwe ukuze sikwazi ukuthi sibaphathe ngokugcwele labo masipala siphinde siqinise nezinhlaka zethu emazingeni amaphansi,” kusho uNks Shinga eveza ukuthi izinkinga zesigungu esiphezulu sikazwelonke siyaklapakela emazingeni aphansi nokwenza kube noqhekeko kumalungu awo.
Uveze ukuthi beyisigungu sesifundazwe bake bayenza imizamo yokuthi bahlanganyele nesigungu esiphezulu seqembu kodwa babuya belambatha. Kuzokhumbuleka ukuthi kuke kwasabalala imibiko ethi abusekho buhle ubudlelwano phakathi kukaMengameli waleli qembu uMnu Ivan Barnes noMnu Sibusiso Mkhabela onguSihlalo weqembu futhi oyiMeya kuMasipala waseDumbe.
Lokhu kwavela ngesikhathi kusabalala umqhafazo kaBarnes ekhala ngokuzitshwa uMkhabela kuzona zonke izindlela zokuzama ukuxhumana naye.
UNkz Shinga uthe okunye okudala kube nzima ukubambisana phakathi kwesigungu sesifundazwe nesikazwelonke wukuthi bonke bampintshene esifundazweni esisodwa.
“Kungakuhle isigungu sikazwelonke sisabalale siye nakwezinye izifundazwe ukuze kwakhe izinhlaka nakuzona iqembu likhule kunokuthi sonke sigxile esifundazweni esisodwa,” kusho yena.
