UBUYELA enkantolo uMholi wenhlangano iNational Coloured Congress uMnu Fadiel Adams okulindeleke ukuba avele eNkantolo yeMantshi yasePinestown namhlanje ngoLwesihlanu.
U-Adams osamisiwe ekubeni ilungu lePhalamende ubhekene necala lokusebenzisa isikhundla sakhe ngokungemthetho ukungena ngaphakathi ejele laseWestville.
Amanye amacala abhekene nawo kubalwa elokukhwabanisa nokuphazamisa ukusebenza kwengalo yomthetho.
Umbuso usola u-Adams ngokusebenzisa isikhundla sakhe sokuba ilungu lePhalamende ukungena ngaphakathi ejele ukuyophenya ngemibuzo omunye wabasolwa ecaleni lokubulawa kowayenguNobhala Jikelele we-ANC Youth League uMnu Sindiso Magaqa.
U-Adams usolwa ngokuthi ngesikhathi epheka lomsolwa ngemibuzo wabuqopha bonke ubufakazi obethulwa yile nkabi phambi kwakhe.
Kuthiwa lobu bufakazi baphinde basetshenziswa ukuzama ukubheca ezinye izikhulu zamaphoyisa ngaleli cala.
Kulezi zikhulu kuvela negama leNhloko yezobuNhloli emaphoyisa uGeneral Dumisani Khumalo.
U-Adams owaboshwa ngoMay ungaphandle ngebheyili ka-R10 000.
