INHLANGANO yezokusakaza eNingizimu Afrika, iSouth African Broadcasting Corporation (SABC), ithi seziphothuliwe izingxoxo ngokusakazwa kwemidlalo yebhola likanobhutshuzwayo yomqhudelwano we-MTN 8, nakuba ingakaziphothuli ezokusakazwa kweyeBetway Premiership.
Kule mpelasonto iSABC ayikwazanga ukusakaza ukuqala kwemidlalo yeBetway Premiership, ngenxa yezingxoxo eziqhubekayo phakathi kwayo nenkampani ephethe iSuperSport, iCanal, okuyiyona enamalungelo asemthethweni okusakaza le midlalo.
Isikhulu esiphezulu sale nhlangano, uNkk Nomsa Chabeli, sithe iSABC izibophezele ukuphothula izingxoxo ngesikhathi ukuze abantu bakwazi ukuthokozela le midlalo. UNkk Chabeli uthe bayakujabulela ukuthi izingxoxo zokusakazwa komqhudelwano we-MTN 8, zisheshe zaphothulwa, njengoba lona kuwumqhudelwano onedumela kubathandi bebhola likanobhutshuzwayo.
UMnu David Mignot, oyisikhulu seCanal, uthe bayabuthokozela ubudlelwano obuphakathi kwabo neSABC ngokusakaza imidlalo yomqhudelwano yeMTN 8.
“Sisaqhubeka nezingxoxo ngokusakaza imidlalo yeBetwayo Premiership, futhi sinethemba lokuthi sizoziphothula maduze,” esho.
I-SABC ixolisile kubathandi bebhola ngokungakwazi ukusakaza imidlalo yale mpelasonto ebihambisana nokuqala kweBetway Premiership.
