LUCKY CAIN
UCATHULISWA yinkakha emculweni umculi owanqoba ohlelweni lukaMasipala weTheku lokuvundulula abaculi be-gospel olubizwa ngeGospel ID Discovery.
UNelisiwe Skhosana owanqoba kulolu hlelo ngonyaka owedlule unyelwe inyoni esandleni ngemuva kokunqoba kwakhe kulolu hlelo njengoba ethole ithuba eliyingqayizivele lokucathuliswa uLindelani Mkhize osekhiqize inqwaba yabaculi futhi ongumsunguli weqembu lodumo iJoyouse Celebration.
Ngaphandle kokucathuliswa nguLindelani, uNelisiwe uyingxenye yalo leli qembu iJoyous 28 njengoba ehola enye yezingoma esihloko sithi All Hail.
Uzokwethula i-EP yakhe yokuqala esihloko sithi Kuvela Kuwe emcimbini wekhethelo ozobe uhanjelwe yizicukuthwane ngoLwesine.
Ngokusho kwesitatimende esikhishwa uMasipala weTheku lo mcimbi uzobe uhambisana nokuqoshwa bukhoma bezinye zezingoma zakhe.
Le ntokazi edabuka KwaMashu kusukela yanqoba kulo mncintiswano kuningi osekwenzekile empilweni yayo njengoba isithole nethuba eliyingqayizivele lokusebenza nale enkakha emculweni.
Uhlelo iGospel ID Discovery wuhlelo lukamasipala osekuneminyaka luqhubeka njengoba luhlose ukuvundulula abaculi abasemkhakheni wegospel.
Luqhutshwa ngaphansi komnyango wezobuciko namasiko kulo masipala.
