BAPHOXEKILE abathengi abebefisa ukuthi ibhangengodla, iSouth African Reserve Bank (SARB), liphinde liyehlise inzalo yemalimboleko.
NgoLwesine uMnu Lesetja Kganyago, onguMbusi weSARB, umemezele ukuthi inzalo yemalimboleko ngeke ishintshwe.
Lesi sinqumo sithathwe yikomidi leSARB eliqondene nemigomo yokwebolekisa ngemali, elibizwa ngeMonetary Policy Committee. Njengamanje izinga lenzalo yemalimboleko ekhokhwa ngamabhange eSARB ihleli ku-7.5%, kanti izinga lenzalo yemalimboleko ekhokhishwa abathengi ngamabhange ihleli ku-11%.
Ngesikhathi enza lesi simemezelo, uKganyakgo ubalule ukuthi ngenxa yezizathu ezibandakanya ukungazinzi kwesimo somnotho emhlabeni, baphoqeleka ukuba baqaphele kakhulu ngomnyakazo abawenzayo enzalweni yemalimboleko.
I-SARB igcine ukwehlisa inzalo yemalo mboleko ngo-25 basis points (0.25%) ngoMasingana (January).
Kanti kunesikhalo emphakathini sokuthi isephezulu inzalo yemalimboleko, ngakho kudinga ukuba yehliswe ukuze kwehle umthwalo kubathengi.
