UMPHROFETHI osematheni kulezi zinsuku, uHamilton Qhoshangokwakhe (HQ) Nala, ngenxa yokuvela exabana namakhosikazi akhe ohlelweni lwethelevishini, uthi amathe azobuyela kwasifuba kwabaningi sekuvela amaqiniso.
UNala ubekhuluma kuTiktok Live womelaphi wendabuko uZamokwakhe “King Bhaka” Nzama lapho abeveza khona lezi zindaba. Uhlelo olukhuluma ngempilo yakhe olubizwa ngoMndeni Somnala, lukhonjiswa kuMoja Love (157) njalo uma kunguMgqibelo ngo-8 ebusuku.
Muva nje uNala odume ngoKing Somnala, uvela exabana namakhosikazi akhe amanye aseze amshiya ekhala ngendlala yocansi njengoba ethi sekuphele iminyaka emihlanu engasayi ocansini noNala.
Ezinkundleni zokuxhumana abantu bayamdelela ngalezi zindaba, kodwa yena uthe akanandaba ngokushiwo abantu ngaye kodwa okuzovela ohlelweni abantu bazodumala ngoba ayikho yonke lento eshiwo ngaye.
Nokuthi kukhona amakhosikazi abengasalali nawo uthe, akafuni ukukhuluma kakhulu ngalokho kodwa iqiniso ukuthi ngeke aqhubeke nokulala nomuntu angasamethembi kahle. Uthe uvele unezinsolo zokuthi kukhona ongasaziphethe kahle, ngeke ke aqhubeka nokulala nomuntu asola ukuthi ulala nenye indoda.
Akuqinisekisile ukuthi konke okwenzeka kulolu hlelo kuyiqiniso ngempilo yakhe. Uthe unkosikazi wakhe okhulume ngaye akamzondi futhi ngeke akunqabe ukuthi abe yingxenye yohlelo olukhuluma ngempilo yakhe ngoba uyahola naye ngokuvela kulona.
