ILIMALE isemzini wabo inkosikazi kaNasreddine Nabi ongumqeqeshi weKaizer Chiefs, okwenze waphuthuma kwelakubo eTunisia isigubhukane ngeledlule.
Kuthiwa umkaNabi ulimale esebenza kwakhe njengoba kuthiwa kwenziwa umsebenzi wokulungiswa umuzi wabo. Kuthiwa uwe kabi kusetshenzwa, okuphoqe ukuba aphuthunyiswe esibhedlela. Kuthiwa ngendlela alimale ngayo, kuphoqe ukuba alaliswe egunjini labagula kakhulu (ICU) ngoba ubekwikhoma, kodwa useyalulama.
Lesi simo siphoqe ukuba uNabi angabi yingxenye yomdlalo wokuqala weChiefs lapho inqobe khona ngo-2-0 iStellenbosch koweBetway Premiership ngeSonto e-Athlone Stadium, eKapa. Ngeke futhi abekhona uma iChiefs isibhekene nePolokwane City kusasa ngoLwesithathu ngo-19h30 eFNB Stadium, eSoweto.
IChiefs ithe makahlale, isimo somkakhe size sibe ngcono. Nokho kuthiwa uyaxhumana nethimba lakhe labaqeqeshi njengoba kuthiwa nasemdlalweni odlule ushiye esenze yonke into.
