OGAQELE esokuba nguMengameli weSouth African Football (SAFA), uSandile Zungu oyisikhulu samaZulu ubonga izifunda nabezemidlalo abamesekile emkhankasweni wakhe njengoba ethe balale phansi bangakhombisa ukuthi bahamba naye ngenxa yokusatshiswa njengoba umkhankaso usuze wafika kuleli zinga okulona.
UZungu usemjahweni walesi sikhundla asibanga noJonny Jordaan. Ingqungquthela okuzomenyezelwa kuyona owinile kusona izoba ngoMgqibelo eGoli.
Uthe uyabonga ngendlela asekwe ngayo kulo mkhankaso njengoba usufika emaphethelweni yize bekunzima. Uthe abanye bebeze benze sengathi bahambisana nohlangothi lwabangisana naye ngenhloso yokumvikela ngoba umbango ubushisa kakhulu.
Abanye uthe bebesatshiswa ngokuthi uma beqhubeka nokweseka uZungu kuzohlakazwa izifunda zabo.
Uqhube wathi abanye bebeze bamtshele ukuthi bekuphoqeleka ukuthi baqhakambise uDanny Jordaan ukuze bangazitholi besenkingeni kodwa bebe bazi ukuthi bazovotela uZungu ngoba bathe babheke ikusasa. Okunye akuvezile ukuthi usenolwazi ngamaqhinga angcolile abehlelwa ukuthi kuphazanyiswe izifunda ezeseka yena okwenziwa yithimba elingahambisani naye.
UZungu ubanga noJordaan osebe kulesi sikhundla kusuka ngo-2013 futhi ufuna ukubuyela kulesi sikhundla ihlandla lesine.
Ithimba likaJordaan lizoba nengxoxo neSABC kusasa ngoLwesine ukuveza izinhlelo zokulungiselela le ngqunguthela yangoMgqibelo.
