I-COMRADES Marathon Association (CMA) isivuselele ubudlelwano bayo ne-32Gi, okuyisikhuthazi-mzimba esihamba phambili kwezemdlalo.
IComrades Marathon yalo nyaka izokuba mhla ka-8 kuJune isukela eMgungundlovu isongwe eThekwini kanti eyakulo nyaka ingenelwe ngabasubathi abawu-24 000 abaphuma kuwona wonke amagumbi omhlaba.
I-32Gi inezinto eziningi ezisiza abasubathi uma bezilungiselela ukuya kogijima nokunye kokuthiba izinhlungu ngemuva kokugijima. I-32Gi ingenye yeziphuzo ezithandwa ngabasubathi abaningi.
Phakathi kwezikhuthazi eziphethwe ngabe-32G1 yi-energy bars, yi-protein recovery nutrition, yi-anti-cramp nezinye eziningi.
Umsunguli we-32Gi uMark Wolff uthi bajabule kakhulu ngobudlelwano babo neComrade.
“Iziphuzo zethu zithokozelwa ngabasubathi abaningi. Abanye ziyabasiza ukukwazi ukumelana nobunzima balo mjaho,” kusho uWolff.
USihlalo weCMA uMqondisi Ngcobo uthe imikhiqizo yakwa32Gi iyabasiza kakhulu abagijimi, ibanika amandla okuba bakwazi ukuqeda iComrades.
