UFIKE nokushisa kwiDStv Diski Challenge (DDC) uSiphamandla Msezane ongumgadli weNjejane ye-Orlando Pirates osembangweni womshayi-magoli ovelele kulesi sigaba esidume ngokuvulela abadlali ithuba lokuyogijima kwiBetway Premiership.
UMsezane, odabuka eVryheid, KwaZulu-Natal, useqobele amagoli awu-14. Ubambene noCee-Jay Bezuinhout weCape Town City okube nguyena ovelele ngesizini edlule ka-2023/24. Balandelwa eduze nguCheswyn Philander noFaiz Abrahams beStellenbosch FC, noKhumo Matlala weTS Galaxy abanawu-11.
IGalaxy isanda kudayisa uSamkelo Kabini owethulwe ngeledlule kwiMolde FC yaseNorway.
Lokhu kukodwa kubeka ngokusobala ukuthi uJoseph Makhanya kukhulu akwenzela le kilabhu nakwiBetway Premiership eyenza kahle kwazise ihleli endaweni yesibili njengoba ziholwa yiMamelodi Sundowns. Iyaqhubeka imidlalo yeDDC ezokube ithe chithi saka ezinkundleni ezahlukene kuleli.
