UTSHELE abalandeli bakhe ngobuhlungu abuzwayo uShauwn Mkhize ekhasini lakhe le-Instagram njengoba edlelwa izimpahla wumthelisi (Sars) kubalwa neRoyal AM esemakethe. Ubhale ukuthi bonke ubunzima abhekene nabo buzodlula.
“Ukubeka uhlangothi lwami ngeke kusasho lutho kepha engikwaziyo wukuthi impilo iyaqhubeka. Yize kubuhlungu, ngiyazama ukwedlulisa. Kodwa okubalulekile kunakho konke, ngifundile ukuthi ubani okufanele ahlale etafuleni lami nokuthi ngubani ongaphinde ahlale,” esho.
Kakucaci ukuthi indaba yokudayiswa kwe-AM kuzophelelaphi njengoba nobekuthiwa uyayithenga iPSL ithole umbiko kuJaco Venter wokuthi uyamchitha. Bekulindeleke ukuthi uRoy Moodley abenesithangami sabezindaba namuhla kumbe kusasa acacise ngalolu daba kwazise usalwa nokuthi kakuphelile ngaye nokuthenga le kilabhu. I-PSL kayikaze ithi vu ngalolu daba ekubeni nesizini isiyosongwa.
