INKANTOLO yamaLungelo aBantu e-Europe ikhale ngokungenziwa kobulungiswa odabeni lukaCaster Semenya ongumgijimi wakuleli, owamiswa kwezokugijinywa esolwa ngokuba namandla amaningi kunabanye abagijimi besifazane.
Lo msubathi wamiswa yiWorld Athletics (WA) kwezokugijima imsola ngokuba nezinga eliphezulu le-testestorone, okuyi-hormone evame kwabesilisa, ebenza babe namandla kunabesifazane. Wayalelwa ukuba athathe amaphilisi okwehlisa izinga lale hormone emzimbeni wakhe uma esazimisele ngokuncintisana nabanye besifazane.
Lo msubathi waseLimpompo wakunqaba lokho. Okunye ayebekelwe kona wukuba agijime amabanga amade kune-800m abegila izimanga kuyona.
UCaster ube esethatha udaba lwakhe waluyisa kwi-Court of Abritration for Sport, yamchitha. Ube eseludlulisela kwiSwitzerland Supreme Court, nayo yamchitha. Ngemuva kwalokho udaba ulwedlulisele eNkantolo yamaLungelo aBantu e-Europe.
UCaster unezindondo ezimbili zama-Olympic Games. Kuthiwa manje udaba lwakhe kuzofanele luphindele kwiSwitzeland Supreme Court, kanti iHuman Right Court ithe ngeke izingene ezinye izinto lo msubathi akhala ngazo.
Kumanje, uCaster ungumqeqeshi ongaconsi phansi kuleli njengoba abasubathi bakhe begila izimanga emijahweni yakuleli. Omunye wabasubathi bakhe ovelele nguGlenrsose Xaba ophethe irekhodi lakuleli leMarathon nele-10km kanti kubhekwe lukhulu kuyena ngeSonto kwi-Absa Durban 10k.
