UMKHONTO weSizwe Party (MKP) uchithwe yiNkantolo yoKhetho esimangalweni sawo, ukhala ngokuthi ukhetho lukahulumeni kazwelonke nezifundazwe lwango-2024 lwalungenabulungiswa, futhi lungakhululekile.
I-MKP iye kule nkantolo ngezinsolo zokuthi kunobugebengu obenzeka ngesikhathi kubalwa amavoti ngemishini yakwa-IEC. Leli qembu belingenankinga ngamavoti ayebalwa ngesandla, kodwa belikhala ngabalwe ngemishini, njengoba lithi kunesikhathi lapho yacisha khona imishini, kwaze kwaphela amahora amabili, okwenza kube nezinsolo zokuthi ayesekhwatshaniswa.
Ngaphambi kokuba likhiphe isinqumo ijaji uLR Adams, kulandwe ochwepheshe abaqonda ukusebenza kwemishini yakwa-IEC. Ebufakazini babo bakucacisile ukuthi akukho okwaphazamiseka ngokubalwa kwamavoti ngomshini. Bathe ngesikhathi kuba nobuhixihixi, kwakuphazamiseke ukuvezwa kwezithombe kumathelevishini akwa-IEC kuphela, kodwa akukho okwakuphazamisekile emshinini owawubala.
Nababegade ukubalwa kwawo kuthiwa babekwazi ukubona okwenzekayo, yize kwakucishile kumathelevishini.
Iphawula ngalesi sinqumo i-IEC, ithe iyasemukela futhi isamile ekuzibophezeleni okhethweni olunobuqiniso nolukhululekile.
Inkantolo yokhetho ikhipha lesi sinqumo nje, ne-ANC ifake isicelo sokubuyekeza isinqumo ngokuchithwa yile nkantolo ekwehlulekeni kwayo ukubhalisa amakhansela angu-181 obekumele angenele ukhetho lohulumeni basekhaya oluzoba ngomhla ka-4 kuLwezi (November) nonyaka.
