UGWETSHWE iminyaka ewu-15 ebhadla ejele owesilisa olahlwe yicala lokubulala indodakazi yakhe eneminyaka ewu-24 ubudala ngemuva kwengxabano.
UFanie Petros Mtshali(60) ulahlwe ngaleli cala elenzeka ngomhla ka-10 ku-September 2022 endaweni yasePhola ngaseMalahleni (Witbank). Ugwetshwe ngeledlule yiNkantolo yesiFunda yaseMalahleni.
Ngokusho kokhulumela amaphoyisa eMpumalanga uLt Col Jabu Ndubane isisulu sabuya sekuhlwile kwase kuqubuka ingxabano phakathi kwaso noyise.
Kubikwa ukuthi safika ngezikhathi zabo-11 ebusuku, uyise wabe esesithethisa ngaphambi kokuthi asishaye ngempama sayowela phezulu kwe-TV sabe sesilimala kanzima sashonela endaweni yesigameko.
Kwabizwa abezimo eziphuthumayo namaphoyisa abafika isisulu sesithule.
Uyise wabe esekhalelwa ngamasongo kaSgonyela wabhekana necala lokubulala.
Wanqatshelwa ibheyili ngesikhathi kuqulwa icala kwaze kwabe uyagwetshwa ngeledlule.
