IPHETHE ngodlame nokucekelwa phansi kwempahla imibhikisho yabalwa nabokufika abebeqhingqe ngaphandle kwamahhovisi oMnyango wezaseKhaya ezifundazweni ezehlukene zakuleli, befuna ukuyobhalisela izimvume zokuba kuleli ngaphansi kohlelo lwababalekele izimpi emazweni abo.
Le mibhikisho ebeyenzeka KwaZulu-Natal, eThekwini,ezingxenyeni zeGoli nase-Eastern Cape, iphethe ngokucekelwa phansi kwempahla yabokufika, okubalwa kuyo izitolo nezimoto, okuthiwa kwenziwe yizakhamizi zakuleli ebezidinwe zigane unwabu.
Ukudinwa kwabakuleli kuza ngemuva kwesinqumo seNkantolo yoMthethosisekelo, esithi abokufika abangena kuleli ngokungemthetho, banelungelo lokuyobhalisela izimvume zokuba kuleli, emahhovisi aKwaNdabazabantu.
Ngemuva kokuphuma kwalesi sinqumo, abokufika abakuleli bavukele emahhovisi akwaNdabazabantu, beyosebenzisa leli thuba. Kusuka ngoLwesithathu, izakhamizi zakuleli, amalungu enhlangano yabalwa nabokufika abakuleli ngokungemthetho iMarch and March, namalungu amaqembu ehlukene ezombusazwe, baqale ukuhambela lawa mahhovisi, beyovimba ukuba abokufika bangakwazi ukubhalisela ukuthola izimvume.
NgoLwesine, baqhubeke nawo lo mkhankaso, okuthe ngokuhamba kosuku, kwasuka isidumo njengoba le mi khankaso iphenduke yaba nodlame. EThekwini, imibiko engaqinisekisiwe iveza ukuthi kube nokubambana ngezandla phakathi kwabokufika ngaphandle kwamahhovisi aKwaNdabazabantu asemgwaqeni uChe Guevara (Moore Road).
Kuthiwa lokhu kuphethe ngokuthi kulimale owakuleli, nokuyikho okucasule abebebhikisha, bashisa inkampani yamasondo ezimoto yabokufika eseduze. Kakuphelelanga lapho, njengoba ababhikishi besuke lapho baqonda enkabeni yeTheku, okuyilapho okuthiwa bacekele khona phansi izitolo zabokufika, bashisa nezimoto zabo.
Kushone elayizolo izitolo zabokufika ezisenkabeni yeTheku zivaliwe, iningi lazo zibulelwe amafasitela. Imibiko yemithombo eyahlukene yabezindaba iveze ukuthi eGoli nakhona kusuke isidumo, kwabanjwana ngezandla, kwaphoqa ukuthi amaphoyisa asebenzise izinhlamvu zenjoloba nesisi esikhalisa unyembezi ukuhlakaza ababhikishi. ESoweto kushiswe izimoto, kwalinyazwa nempahla.
Okhulumela amaphoyisa KwaZulu-Natal, uCol Robert Netshiunda, uthi amaphoyisa akwazile ukusheshe asilawule isimo ngaphambi kokuba konakale kakhulu.
