IBHODLA umlilo ingoduso nezingane zayo ezintathu, emuva kokunqatshelwa ukuyofihla umyeni, isolwa wumndeni ngokuba nesandla ekufeni kwakhe.
Ngokuthola kweLANGA, umufi uMnu Sikhumbuzo Ngema, ongowokudabuka eNkandla, obeshayela amaloli, wanyamalala eseGoli, ngomhla ka-03 kuZibandlela (December), wonyaka odlule, isidumbu sakhe satholakala kuyo le nyanga uNdasa (March), sesonakele, sathunwa ngempelasonto esibuya kuyona.
ILANGA likhulume nengoduso kamufi, uNkz Nomzamo Mdlalose, (abasesithombeni), obebhodla umlilo, njengoba ethi yena nezingane zakhe ezintathu, bavinjwe ngabakwaNgema ukuya emngcwabeni, njengoba umndeni kamufi ubunuka yena ngokufa kwakhe.
Uthi kumzwise ubuhlungu ukushaywa ngesithende ekulungiseni izinhlelo zokufihla umyeni wakhe, ngoba ubesenyamanambana kwabasemzini. Ulandise ILANGA ngokunyamalala komyeni wakhe, nangobunzima athi ubhekane nabo.
“Selokhu kwaduka umyeni wami, impilo yavele yashintsha, ngaphenduka isitha kwabasemzini. Umyeni wami wavuka ekuseni, wathi uya emsebenzini, kanti uya eshendeni lakhe. Nalokho ngakuthola ngoba sengibona kushaya isikhathi engabuyi. Ngesikhathi ehambile, sasilokhu sixhumana, engazisa ukuthi uyabuya. Ngagcina ukukhuluma naye ngabo-17h00 ntambama, ngemuva kwalokho sangabe sisaxhumana.
“Ngabe sengifonela omunye wabafowabo, wangitshela ukuthi naye uke wakhuluma naye osukwini. Ngokubona engabuyi ekhaya, ngakusasa ngivukele emaphoyiseni ngayombika (njengomuntu odukile). Sibhekile ukuthi uke wafika yini emsebenzini, okuthe uma kubhekwa imininingwane lapho kuhambe khona imoto (Tracker), kwabonakala ukuthi akakaze aye emsebenzini,” esho.
UNkz Mdlalose uthi phambilini bake baba nezinkinga (nomyeni), njengoba ebesola ukuthi kukhona omunye wesifazane umyeni wakhe ahlekisana naye. Uthi ngesikhathi umyeni enyamalele, umndeni womyeni uke wamsongela ngokumbulala. Uthi amaphoyisa abamba abasolwa ababili, okuthiwa baveza ukuthi babethunywe ngowesifazane ukuba babulale umufi.
“Amaphoyisa eza nabantu ababambile, athi ngabasolwa abaveze ukuthi babethunywe ngumakoti kamufi, kodwa athi uma engibona (amaphoyisa), athi akumina lona ofunekayo, kodwa ngomunye wesifazane ohlala eThokoza, eGoli. Asuka lapho (amaphoyisa) ayombheka lona wesifazane, athola ukuthi useshintshe indawo yokuhlala,” kusho uNkz Mdlalose.
Uthi okubuhlungu kakhulu wukuthi abasemzini wakhe bamephuca zonke izinto zomyeni, bathi sebeyile ukuyohlola ebantwini abathathu, kwavela ukuthi umyeni wakhe ubulawe ngumuntu wesifazane, okuyilapho aphenduka iqaqa emzini.
Uthe okumzwisa ubuhlungu wukuthi izingane zakhe zingakwazi ukuyofihla uyise, njengoba zatshelwa emehlweni ukuthi akuzona ezikamufi. Utshele ILANGA ukuthi nakuba esetholakele umenzi wobubi, kodwa akukho okukhulunywayo naye, ukuze kukhunyelwane umlotha. Uthe kuyimanje uhlalele ovalweni, ngoba impilo yakhe isengcupheni.
Okhulumela amaphoyisa aseGoli, uCol Dimakatso Nevhuhulwi, uthunyelelwe imibuzo, wakuqinisekisa ukuthi uyitholile, kodwa kuze kwashaya isikhathi sokushicilela engayiphendulanga.
ILANGA likhulume noNkk Thokozile Ngema ongunina kamufi, othe ibuhlungu into eyenziwa yingoduso yabo, njengoba isizobafaka emaphephandabeni, ekubeni ibingabambisene nabo ngesikhathi indodana yabo inyamalele.
UNkk Ngema wehlulekile wukuzibamba, wakhihla isililo, echaza ngobuhlungu ababuzwayo ngokushona kwendodana yakhe. Ukuchithile ukuthi bayinqabelile ingoduso yabo ukuthi izofihla umyeni wayo.
