IZOBANJELWA e-Eastern Cape imidlalo yokukhipha ompetha ababili beSafa ABC Motsepe League National Play-Off’s abazonyukela kwiMFC ngesizini ezayo. Le midlalo ihlale ihlabahlosile kwazise kusuke kubanga zonke izifundazwe zaseNingizimu Afrika.
Ngesizini edlule kukhuphuke iGomora United neMidlands Wanderers. UKwenzakwakhe Ngwenya oyesekomitini leSafa lesifundazwe utshele ILANGA ukuthi isifundazwe sase- Eastern Cape yisona esihlabane ngelungelo lokusingatha le midlalo. Uthe uMtata Stadium yiwona ozosetshenziswa njengenkundla okuzodlalelwa kuyona. Uthe isifundazwe iFree State sisale kancane ekutholeni lelilungelo lokusingatha le midlalo.
” Sihlele ukuthi le midlalo yokuhlunga kazwelonke ibe mhla ka-1 kuya ku-7 kuNhlangulana (June). Yingakho sibone kungcono neyaseKZN imidlalo isheshe iphothulwe ngokushesha ngalempelasonto ukuze ikilabhu ezodlulela phambili ibenesikhathi esanele sokuzihlela. Le midlalo yesifundazwe izokuba mhla ka-16 kuMeyi ngoMgqibelo ngo-13h00, eSugar Ray Xulu Stadium, eClermont. UMvoti FC noMkhambathi FC yibona abazobanga ngoMgqibelo ukuthola ikilabhu eyodwa ezomela isifundazwe kuzwelonke.
Kulindeleke ukuthi ithanyelwe ngabalandeli abaningi baseKZN.
