ISIYABONGA Sangweni Sports Complex, eDondotha, KwesakwaMthethwa, izosingatha imidlalo yeMfolozi Mayoral Cup kule mpelasonto, ebizwa ngokuthi iBV Mthethwa Tournament.
Lo mqhudelwano ngowokukhetha isikwati saseMfolozi esizokuba yingxenye yeKing Cetshwayo Mayoral Cup, lapho kuzokube kukhethwa isikwati esizokuya kumaSalga Games.
Umqhudelwano wanonyaka wokuhlonipha uBV Mthethwa, obeyimeya yaseKing Cetshwayo isabizwa ngoThungulu Municipality, izoqala namuhla ngoLwesihlanu, kuthi eyamanqamu ibe ngeSonto. Le nkundla yaseDondotha iqanjwe ngoSiyabonga “Nsimbi” Sangweni, ongomunye wabadlali abavundululwa emidlalweni yamaSalga.
Lo mqhudelwano uhanjelwa yizithunywa zamakilabhu amakhulu kuleli, ukuyohlonza ikhono. Ukwethiwa kwalo mqhudelwano ngoMthethwa kuqinisekiswe yimeya yaseMfolozi uXolani Bhengu ngesikhathi wethulwa ngokusemthethweni ngoMsombuluko.
“UMthethwa ubambe elikhulu iqhaza ekuthuthukiseni ezemidlalo kule ndawo. Sikhethe ukubiza lo mqhudelwano ngegama lakhe ukuze iqhaza lakhe lingafadalali emphakathini,” kusho uBhengu.
Kulo mqhudelwano kuzokube kugaduliswana kwezemidlalo ezahlukene okuhlanganisa ibhola lezinyawo, iNetball, iVolleyball, iTennis, ezokugijima, nama-Indigenous Games neminye.
AmaSalga Games azokuba ngoZibandlela (December) eMgungundlovu.
