KUKHONA abantu abathenga izinto bese beyazisola ekugcineni, ekubeni sebechithe enkulu imali. Ongoti bathi kubalulekile ukuthi ngaphambi kokuba uthenge yinoma iyiphi impahla uzulazule ezitolo ezahlukene uqhathanisa amanani, izinga, nohlobo lwaleyo mpahla ofuna ukuyithenga lokhu bakubiza ngokuthi yi ‘window shopping’.
Lokhu bathi kusiza ekutheni engathengi into okuzothi ekuhambeni kwesikhathi ufune ukuyibuyisela emuva ngenxa yokuthi isikunika izinkinga. Uma ufuna ukuthenga imoto kubalulekile ukuthenga ibhuku elichaza ngohlobo lwaleyo moto ofuna ukuyithenga. Kunabantu abaqashelwe ukukhangisa nokuthengisa izimpahla, kungaba ifenisha, izimoto, nezimpahla zokugqoka. Kuthiwa qaphela abantu abenza lowo msebenzi “banolimi nesisoka” bangakuyenga uthenge into ozozisola ekuhambeni kwesikhathi uma usuyithengile. Ukwenza i”window shopping” kusiza ekutheni uzinika isikhathi sokuthi ubheke ukuthi impahla oyithengayo angeke ikhinyabeze iphakethe lakho noma kugcine sekufika abantu owayithenga kubo sebezoyilanda.
Ukwenza lokhu kukunika isikhathi sokuqhathanisa ikhwalithi nezinga laleyo mpahla ofuna ukuyithenga. Kunabathengi abathenga izinto ngoba zithengwa ubuthaphuthaphu ngaleso sikhathi (zisefeshinini). “Uma wenza iwindow shopping, uyakwazi ukuqhathanisa amanani ngoba ungena ezitolo ezahlukene futhi uzinika isikhathi sokuqhathanisa nokubheka izinga lezimpahla ohlela ukuzithenga.
Uma kunendali esitolo esithile uyashesha ukuyibona uma ujwayele ukwenza iwindow shopping. Lokhu kusiza ekutheni uthenge impahla ethile namhlanje ngakusasa uzisole ukuthi uyithengeleni, njengoba usubona enye efana nayo ishibhile esitolo esithile. Kuyasiza futhi ukuthi uthenge izinto ozidinga ngempela, ongeke ukwazi ukuphila ngaphandle kwazo njengo kudla kwasekuseni. Umuntu owenza iwindow shopping usuke engenayo inhloso yokuthenga ngalelo langa.
Abantu abayenza ubabona bezula zula enxanxatheleni yezitolo uma behlabe ikhefu emsebenzini noma ngezimpelasonto. Inhloso kusuke kuwukuqhathanisa amanani nokubheka izinto ezisendalini ngaleso sikhathi,” kuchaza uNkz Zama Khuzwayo ongumeluleki wabathengi. Abanye abantu uma befuna ukuthenga izimoto baya kwezinye izifundazwe bayobheka khona, njengabantu abasuka KwaZulu-Natal baye eGauteng ngenhloso yokuthenga izimoto noma izimpahla zokugqoka.
menzi.jele@ilanganews.co.za
