INTATHELI YELANGA
IBIZE “nedlozi” lodumo kwiBetway Premiership (isabizwa nge-Absa Premiership) iMozambique esikwatini sayo ezogadla ngaso kw-Africa Cup of Nations (Afcon) eMorocco kusukela mhla ka-21 wale nyanga, kuya mhla ka-18 kuJanuary.
NGU-ELIAS Pelembe (okwesobunxele) enozakwabo eqenjini leMozambique, u-Edmilson Dove wodumo kwiChiefs.
Kulo mqhudelwano iBafana Bafana – okubhekwe lukhulu kuyona, kwazise kwi-Afcon edlule ibuye nendondo yethusi – iseqoqweni linye ne-Egypt, iZimbabwe ne-Angola. Izovula ne-Angola mhla ka-22 ngo-19:00, ilandelise nge-Egypt mhla ka-26, ngo-17:00, ivale neZimbabwe mhla ka-29 ngo-18:00.
IBafana iya kulo mqhudelwano nje, umdlali omdala kunabo bonke kuyona, nguRonwen Williams (33), ongunozinti weMamelodi Sundowns, kungafani nomakhelwane beNingizimu Afrika, iMozambique, ebize u-Elias “Domingues” Pelembe (42) wodumo kwiSundowns, Bidvest Wits (engasekho) neRoyal AM eyaqopha umlando omubi ihlakazwa isagijime imidlalo ewu-11 ngesizini edlule, okwenza iligi yaqeda inamakilabhu awu-14.
NGU-RONWEN Williams ongunozinti weBafana Bafana.
Igama likaPelembe liqinisekiswe ngesikhathi umqeqeshi weMozambique, uChiquinho Conde ememezela iqembu labadlali abawu-25 ngoMgqibelo. Njengoba eya kwi-Afcon yanonyaka, uzokuba ngumdlali wesibili omdala ukugijima kule midlalo. Irekhodi liphethwe ngu-Essam El Hadary owaba ngunozinti we-Egypt eneminyaka ewu-44 ngo-2017.
Eqenjini likaConde kukhona noManuel Kambala ogijima kwiPolokwane City. Ukhona no-Edmilson Dove wodumo kwiChiefs, osegijima kwi-Al-Quwa Al Jawiya yase-Iraq.
IMozambique iseqoqweni elinzima njengoba izovula le midlalo nezingqwele ze-Afcon, i-Ivory Coast mhla ka-24, ngo-19:30, kube yiGabon mhla ka-28, ngo-14:30, ivale neCameroon mhla ka-31 ngo-21:00.
