KUTHIWA uthukuthele uyaveva uMengameli Cyril Ramaphosa ngokuhlehla kukuhlala kweKhomishana yeJaji uMbuyiseli Madlanga, ezophenya ngezinsolo ezenziwa nguMkhuzi wamaPhoyisa KwaZulu-Natal, uLt-Gen Nhlanhla Mkhwanazi.
IKhomishana kaMadlanga bekufanele iqale ukusebenza ngoMsombuluko ozayo, mhlaka 1 kuMandulo (September), kodwa kwatholakala ukuthi imishini nezinye izinto okufanele isebenze ngakho kakukho esikhungweni iBrigette Mabandla Justice College, eTswane, lapho ezohlala khona.
Ngesikhathi uRamaphosa utshelwa ngokuhlehliswa kokuhlala kwekhomishana, uyalele uNgqongqoshe wezoBulungiswa nokuThuthukiswa koMthethosisekelo, uNkz Mammoloko Kubayi ukuthi akenze uphenyo ngembangela yalokhu, bese ethathela abathintekayo izinyathelo zokuqondiswa ubugwegwe.
UNgqongqoshe uKubayi uphoqeleke ukuthi amise emsebenzini uMqondisi woMnyango, u-Advocate Doc Mashabane, nephini lakhe uMnu Jabu Hlatshwayo. Ikhomishana kaMadlanga ibhekwe ngabomvu kwazise izinsolo zikaMkhwanazi, zaholela ekutheni uNgqongqoshe wamaPhoyisa, uMnu Senzo Mchunu, amiswe emsebenzini.
Le khomishana ibekelwe izinyanga ezintathu, kanti ukuhlehliswa kwayo sekwenze iqembu i-Economic Freedom Fighters (EFF), lakhipha isitatimende esithi kukhona okudla amantshontsho emsamo. Usuku ezoqala ngalo ukusebenza luzobuye lumenyezelwe.
