UMNYANGO wezokuVakasha nokuThuthukiswa koMnotho, KwaZulu-Natal, neBandla i-Evangelical Lutheran Church of Southern Africa (ELSA), elibuye laziwe ngokuthi yiBandla lamaLuthela, bazosingatha umcimbi wokubugaza iminyaka eyi 100, isibhedlela sase Appelsbosch (oZwathini) sasungulwa.
Umcimbi uzoba kusona lesi sibhedlela, esingaphansi kukaMasipala waseMshwathi, ngeSonto lomhlaka 20, kuMandulo (September). AmaLuthela, ayesuka eSwidi (Sweden), afika oZwathini, ezoshuyamela ivangeli, ngo-1886. Amakhosi ayephila ngaleso sikhathi, endaweni, awanika lawo maLuthela, indawo akha indlu yesonto, negumbi elolidwa lokufundela.
Ngo-1926, kwakhiwe i-Appelsbosch Hospital, lena eqeda iminyaka eyi-100, ezokwenzelwa umcimbi ngeSonto. Isitatimende esikhishwe nguMnyango sithi:
“I-Appelsbosch, iyikhaya lenkolo (ngoba kuneBandla lamaLuthela laphaya), iyikhaya lemfundo (ngoba kwakukhona ikolishi lokuqeqesha othisha besifazane eselavalwa, laphendulwa iTVET College), iyikhaya lezempilo (ngoba kwasungulwa izibhedlela, laphaya, esisekhona namanje).
UMbhishobhi omkhulu wamaLuthela, KwaZulu-Natal, uNkosinathi Musawenkosi Mnyaka, uzobe ephelekezelwa ngabafundisi, bakwa-ELSA, izikhulu zoMnyango wezeMpilo, izikhulu nezisebenzi zoMnyango wezokuThuthukiswa koMnotho nezokuVakasha, esifundazweni, oholwa nguMfundisi Musa Zondi, naye ongumfundisi waseLuthela.
Ukubungaza iminyaka eyi-100, kwakhiwa lesi sikhungo sezempilo, kuhloswe ngakho ukuqhakambisa ezokuVakasha, esifundazweni njengoba umsebenzi wokuhlela lomcimbi unikwe uDkt Sibusiso Ndebele, onguSihlalo weBhodi lezkuVakasha, esifundazweni. Inyanga kaMandulo inyanga okuqhakanjiswa ngayo ezokuVakasha eKZN.
menzi.jele@ilanganews.co.za.
