UTHOLWE engenamacala eNkantolo eNkulu yaseGqeberha uMfundisi uTimothy Omotoso waseNigeria obebhekene noxhaxha lwamacala okubalwa kuwona awokudlwengula, ukunukubeza ngokocansi, inkohlakalo nokushushumbisa abantu.
Lethula isinqumo namuhla ngoLwesithathu, iJaji uNkk Irma Schoeman, lithe umbuso wehlulekile ukwethula ubufakazi babo njengobungangabazeki.
Lo mfundisi, webandla iJesus Dominion International (JDI) ubethweswe lawa macala noLusanda Sulani noZukiswa Sitho, nabo abatholwe bemsulwa. Leli cala bese kuphele iminyaka ewu-8 liqulwa, kanti lo mfundisi ubegqunywe esitokisini.
Kube wumzuzu womunyu ku-Omotoso, yena namalungu ebandla bathandaza ngemuva kokukhishwa kwalesi sinqumo. Bekugcwele ngaphandle enkantolo, izinhlangano ezehlukene zizokweseka izisulu. Phakathi kwabebengaphandle, kubalwa namalungu e-ANC Womens League abebhikisha ngaphandle, ephethe izingqwembe ezinemibhalo efuna ukuba alahlwe ngecala u-Omotoso.
U-Omotoso uthe akakanqumi ngesinyathelo esilandelayo, okwamanje usafuna ukuyophumula.
