PHUMLANI GAMA
LIGCWELE izinkalo ibhungu elisolwa ngokugenca, libulale uninakhulu ngoMgqibelo ebusuku kubangwa ukongiwa kwamanzi eMphola, KwaNongoma. Kubikwa ukuthi umsolwa okunezinsolo zokuthi usekubhaceni, ubenengxabano noNkz Bathabile Mthethwa onguninakhulu, okuthe besahilizisana, wadonsa ifosholo ebelisegcekeni, wamshaya ngalo.
Kubikwa ukuthi umshaye waze wamyeka esebona ukuthi usephelelwe ngamandla. Ngokulandisa kowesifazane ongumakhelwane kamufi, ingxabano isuswe yinkulumo kamufi obenxusa umsolwa ukuba angawasebenzisi budlabha amanzi ngoba naye uyazi ukuthi atholakala kanzima. “Kufike ingane igijima, izocela ukuba siyibizele amaphoyisa ngoba umfowabo useshaye wabulala uninakhulu. Kuthe uma sifika khona, sathola isidumbu sikagogo sintanta phezu kwedamu legazi. Iyodwa into ebusa lo mfana, wukungezwani nesikole nokugxila ekusebenziseni izidakamizwa. Kalukho uhlobo lwesidakamizwa angaludli. Uyingane eluhlaza. Nathi siyayesaba le ngane ngenxa yobudlova bayo,” kusho umakhelwane.
Okhulumela amaphoyisa KwaZulu-Natal, uLt-Col Robert Netshiunda, usiqinisekisile lesi sigameko, wathi amaphoyisa avule icala lokubulala, athungatha umkhondo womsolwa.
