THANDOLUHLE NGUBO
UKUBAMBEZELEKA kokuhlinzekwa kwenkantolo ngamaphepha agcwaliswe ngosonhlalakahle kuholele ekuhlehlisweni kokuwiswa wesigwebo sikaNongcebo Faith Ntombela (43) obhekene namacala amahlanu okubalwa kuwo nelokubulala umyeni wakhe owayeyisikhulu samaphoyisa kaMasipala weTheku.
UCpt Thomas Zwelakhe Ntombela wadutshulwa wabulawa esemzini wakhe ngoNhlaba (May) wonyaka odlule. UFaith ubevele ngoLwesine eNkantolo eNkulu yaseThekwini lapho obekulindelwe khona ukuba ijaji, uMnu Mahendra Chetty, limgwebe ngemuva kokuvuma icala ngoNcwaba (August) walo nyaka.
Ijaji lithe ukuthi lizodinga isikhathi ukuze lifunde umbiko wosonhlalakahle oqukethe imininingwane mayelana nokunakekelwa kwezingane zikaFaith, ungaphambi kokumgweba.
Ngokuthola kweLANGA, lo mbiko uqukethe ulwazi oluthi izingane zakwaNtombela ezine (okungezimbili zikaFaith nabazukulu ababili) zinakekelwe kahle ngaphansi kwesandla sikaMnu Nathi Ntombela, oyiwele likamufi.
Abanye ababandakanyekayo kuleli cala yinkabo uMzo Ntombela owavuma icala, wagwetshwa iminyaka ewu-20, nguMnu Sithembiso Khumalo onguthishanhloko waseMpephose Primary School, KwaMaphumulo, noKhulani Cele ovele udonsa udilikajele ngecala lokubulala elingahlobene naleli.
Inkantolo ikuhlelisele umhla ka-29 kuLwezi (November) ukukhishwa kwesigwebo.
