LILOKHU ligobhoze njalo igazi labesefazane ababulawa ngabantu abasebudlelwaneni nabo eNingizimu yeKwaZulu-Natal. Namuhla ngoLwesihlanu kuvele imibiko ngowesilisa ona-24 waseMkhomazi, ogwaze wabulala unina wengane yakhe ona-22 nengane yabo yomfana eneminyaka emithathu, ngaphambi kokuzibulala ngokuzilengisa.
Kwenzeka lokhu nje, izwe lisababaza isehlo esenzeke ngoLwesibili ntambama eMandawe, eMzinto, lapho uMnu Sibusiso Ntaka egwaze wabulala ingoduso yakhe, uNkz Ntobeko Cele (25), maqede wanameka i-video enkundleni yokuxhumana uFacebook, eyisola ngokungathembeki, ngaphambi kokuzilengisa ehlathini eliseduze.
Udaba lwanamuhla lusaqhubeka njengoba amaphoyisa esesendaweni yesigameko. Okhulumela amaphoyisa KwaZulu-Natal, uCol Robert Netsiunda usiqinisekisile isigameko. Uthe amaphoyisa aseMkhomazi aphenya amacala amabili okubulala, nedokodo elilodwa lokuzibulala komuntu, ngemuva kokutholwa kwezidumbu ezintathu ngoLwesihlanu ekuseni.
“Amaphoyisa afike endaweni yesigameko azithela phezu kwezidumbu ezimbili okungesowesifazane nengane yakhe, zinamanxeba amaningi okugwazwa. Umsolwa utholwe elenga endlini, ebeke nomazisi babo phezu kombhede,” esho.
