LUYASATSHALALISWA uhlelo lwezobuchwepheshe lokushaywa komazisi abangamakhadi (smart ID), nama-passport emabhange aseNingizimu Afrika, oluzolekelela ekutheni abantu bagweme olayini abade emahhovisi oMnyango wezaseKhaya.
NgoLwesithathu, umnyango usayine isivumelwano sokusebenzisana neFNB, kanti ngoLwesibili usayine isivumelwano esifanayo neCapitec. Uphinde wasayina lesi sivumelwano neStandard Bank.
Beluvele lusebenza uhlelo lokushawa komazisi nama-passport emabhange, kodwa belusavivinywa kusukela ngo-2015. Nokho abemancane kakhulu amagatsha asemabhange lapho abantu bebesizakala khona – njengoba ebalelwa ku-30 ezweni lonke.
Njengoba sekusayinwe lesi sivumelwano sokusebenzisana, umnyango uthi kuzokwandiswa isibalo samagatsha amabhange lapho abantu bezosizakala khona. Uthi kuzokwengezwa amagatsha awu-100 emadolobheni nasezindaweni zasemakhaya.
Uthi uzimisele ngokuthi lolu hlelo lusatshalaliswe emagatsheni awu-1 000 amabhange ahlukene ngo-2029. Phambilini, abanye abantu bebekhononda ngokuthi lolu hlelo lwasemabhange lusezindaweni ezikhethekile – emadolobheni amakhulu – obekwenza lubukeke njengolwabantu abakhethekile. Belutholakala emabhange akhethekile eGoli, eThekwini, Cape Town nasePretoria.
UDkt Leon Schreiber, onguNgqongqoshe wezaseKhaya, uthi ukusatshalaliswa kwalolu hlelo kusho ukuphela kolayini abade emahhovisi omnyango.
Lo mnyango ubhalele wonke amabhange akuleli; okubalwa kuwo i-ABSA, i-African Bank, iTyme Bank, iCapitec, iDiscovery, iFNB, i-Investec, iNedbank neStandard Bank, unxusa ukuthi kusetshenziswane.
Kuthiwa usalindele impendulo kwamanye amabhange. Lolu hlelo kukholakala nokuthi luzolekelela emkhankasweni womnyango wokuqeda omazisi abangamabhukwana aluhlaza, bonke abantu babe nalona oyikhadi.
USchreiber uthi akwamukeleki ukuthi namanje kusenabantu abawu-18 million abanomazisi abadala. Umnyango ubungakayikhiphi imininingwane egcwele ngamagatsha amabhange engeziwe.
